Beyendeza 2

Chapter two.
Emishozi hamwe nemigyera bikaba nibyesimisa. Hakaba hariho omushozi ogwabeire nigushushana n'ente bihogo,eyabeire nekundwa abantu baingi omukyang'ekyo.
Kuwabeire ogureeba okumara obwire bureingwa,okaba oreeba ekyaaro kya Nyabwiina.Nyabwiina,ekaba eri nungi munoonga,kandi hoona buri mwana owabeire nakomooka omukyaro eki,akaba nayesiima ahabworungi bwaakyo.
Mbwenu omushozi ogu gukaba guboneire munoonga. Abantu baingi, bakaba nibagyira ngu Ruhanga obuyabeire namaririza okuhanga ensi,aho niho yamariire obwire bwingyi.
kandi weena owabeire agyezaho kuguzanisa,akaba abona ebizibu byingyi .

Mbwenu ekyokutangaaza,abasigazi babiri baretwa omurufunjo ,batandika kurekyera amabaare. Omwe aha basigazi babiri,akaba nayiragura nkamakara,kandi ayiine ebisya bireingwa. Eiziina rye akaba nayetwa Rukirande,ekyirikumanyisa omuhanda rworushozi.
Ondiijo musigazi akaba ayiine amaisho mahango kandi mugufu munonga.
Ahamushozi ogu,tiburyomwe weena ngu akaba nabaasa okuguhikaho,shana hoona abazeire baawe  kubabeire baba batakyiri omumagara gensi egi,ningashi okozire endagaano na mukama warwo.
Omukanya kakye,obwe abasigazi aba, bariyo nibazanisa amabaare,Beyendeza aretwaho.
Kubamurebire,batandika okwegyezamu,bury'omwe arikworeka obukoryo obuyabeire ayine omukurwaana.
Emikono yaabo ekwatagana,reero batandika kweteeza enduuru.
Ekyekango kyikakwaata Beyendeza,atyo ayiruka kubatanuura.
Kuyabeire yamara kubatanuura,omusisa gwamaani gwabaho,atyo yatandika okutiina,obwe atarikumanya ekyabeire nikyigyenda omumaisho.
Hakaba hariho eibare rihango,eryabeire rimazireho obwiire bwingyi.
Eizooba eryo,rikahiguka.
Rukirande atandika okuyomba agumize ati.
"Iwe mwana oyine amaani maingi munoonga.Naaku yagyira ekiniga. nooza kushashura ebyasisikara byoona."
Beyendeza agyira okutiina munonga,atandika kwefuza ekyaba kyamureeta.
Kubabeire bakyirya'aho,haija omwirima gwakwata ekyaro kyoona.
Obwe hakaba hariho omukeikuru owabeire natuura ahamushozi ogu barikumweta Naaku.

Naaku akaba ari omukazi owabeire ateine amabere. Abantu bingyi bakaba nibamutiina,kandi owabeire aza kuganiira nawe,atunga ekyarikwenda.
Nobu Beyendeza yagyiire kuramura abasigazi ababeire nibarwana,hoona bambe akaba naza kureeba omukaikuru "Naaku"
Mbwenu omwirima kugwabeireho,abasigazi ababeire nibarwana batandika kwetombeitwa.
"Owakugyira ngu otutanuure nooha?"
Batyo batandika kuhaya,reero Beyendeza ashoberwa kandi agyira okutiina.
Omukanya kakye,Eiraka rigambira ahamwanya ogwarugyireho eibare,rigumize riti.
"Owakyikora naaza kukareeba."
Boona bashoberwa,konka kandi  Rukirande hamwe na Bwogi  bakaba nibamanya ekyabeire nikyigyenda omumaisho.
Batyo batandika kugambira Beyendeza bati:
"Ekyagyira ngu oturamure,ba ruhanga ba Naaku nibaza kukwita.
Mbwenu ekyorakore,ozeyo omushabe okusaasirwa.
" Naaku'' akaba natuura ahansi yeibare,kandi hoona akaba ayine abaana babiri bonka Rukirande na Bwogi. Owabeire akwaata aha baana be akaba abonabona okuhisya obu ariruga omumagara gensi egi. Omukyeno ogu gukaba gukwata weena owabeire amuzanisa ahabwokugyira ngu akaba ateine amabeere.
Nangwa Mbwenu okwenda ngu abantu bamwe batungye byingyi bwanyima y'okufa kwabazeire baabo,owabeire aza owa Naaku,akaba atunga kyona ekyiyabeire amushaba.
Mbwenu Beyendeza afukama omumeisho gekiina ekyarugyireho eibare atandika kushaba okusasirwa.
Kuyabeire akyiriyo nagamba,ahurira eiraka nirimugyira riti:
"Ekyorikwenda ninkyimanya,konka wakora ekyitagambwa.
Nahabwekyo,okwenda ngu nkusasire kandi nkuhereze ekyorikwenda,banza ojumare ahansi,haza nkuhereze ekyifubiro ekyikushemereire.
Atyo Byenaku nokutiina kwingyi,ajumara ahansi.

Mbwenu owakubasa kukutebeza nowabeire ariho. Eminyafu eyabeire nemuhurutura,taramanyire ahuyarugyire.
Kandi hoona n'owabeire namuteera akaba atarikumureeba.
Omuburomborombo bwomushozi ogu,weena owabeire atererwaho,ebyeye owahiguru niwe yabeire abimara.
Bwanyima yenkoni nyingyi,amaisho ga Beyendeza gakatandika kureeba ebintu birikwiragura. Atyo atandika kureeba omukaikuru ashutami aha katebe kakye munonga.

Omukaikuru amugyira ati.:
" Nooza kuba omugeiga kworakorese kurungi ebinaaza kukugambira.
Mbwenu,nyowe noreeba tinyiine amabeere,abaana bangye tibarabasize okwonka amashereka gangye.
Ninyenda ngu naiwe ogume ompereze eshagama eyokuriisa abaana bangye buri mwaka.
Korakore ekyompaho,nooza kutunga ekyo kyoona ekyorikwenda.
Kandi namwene'sho naaza kutuntumuka agyende."
Beyendeza amugarukamu ati:
"Eshagama ningyiya nkahi?"
Naaku amugarukamu ati:" obuuze bagyenzi baawe abakwohereza ahamushozi ogu,nibaza kukugambira ekyokukora."
Beyendeza ayehurikyirira konka bwanyima ayikyiriza kuronda eshagama.
Naaku atyo akwata ekisisa ekyabeire kyirimu amaizi,agashuka ahansi. Kuyagashukyire ahansi,harebekaho ekyererezi. Atyo aragyiira Beyendeza okurigasaho.

Beyendeza owabeire ayeshungyire obugeiga,atyo arigasaho.
Naaku amugyira ati.: "webare munonga,wakora endagano norushozi oru. Oshemereire okuguma norutayayira hatiine okukwasire aha mukono."
Beyendeza ashemererwa munonga. Reero Naaku amuhereza akati,akabeire kakozirwe omu ruhu rwenjoka amugyira ati:
"Akati aka okahumuze enyima yorugo rwanyu. Nikaza kutuntumura mwenesho,kandi nabantu boona nibaza kuguma nibakwikyiririzamu. Weena orikuteganisa aryafa kubi."
Obwe Rukirande na Bwogi abaana ba Naaku bakaba bemereire enyima ya Beyendeza,konka we bambe tarabasize okubareeba obuyabeire nagamba na Naaku.

Bwanyima yeshaaha nkye,omwirima gurugaho,kandi na Naaku aburira aho.
Reero Beyendeza atandika kureeba Rukirande na Bwogi,bamugyira bati.
"Omukeikuru yatugambira byona. Nobaasa kugaruka owanyu."
Reero Beyendeza ashobooka mpora nk'enjoka agaruka owaabo.
Orugyendo rukaba ruri rureingwa munonga konka okushuma kukamwanguhira..
Nitwongyeraho.
Shoma Beyendeza 3