Beyendeza six

Chapter six
Bwanyima yemyaka ikumi,Byenaku akaba yatandikyire kuganyirwa omu mirimo eyiyabeire nakora.
Eizooba rimwe,akeimuka omukasheeshe kare munonga,atyo agyenda kuronda engano nkokuyabeire atweire nakora.
Atyo,ahika ahabashubuzi ruranganwa,ababeire nibamuguza aha sente nkye munonga okugyira ngu nawe aganyirwemu.
Mbwenu kuyahikyire omukibuga Kampala,yakoresa amagezi nobwonko bwingyi okubasa kwebeisaho.
Omurimo gwe akaba nakora amandazi,kandi arikusiika nenyama y'enkoko aha mihanda mikuru omukibuga.
Kuyabeire ariyo nasiika enkoko,haijaho abasheija babiri ababeire beine enjara.
Omwe amugyira ati:
"Mpayo enkoko ye kasanvu."
Obwe ,Byenaku owabeire yamanyiriire kugamba oluganda,atekaho omutiima okushemeza abahagyizi beye.
Kuyayimwitse amaisho, areeba omushaija amwetegyereza,munonga,nikwo kumubuuza ati:
"Niiwe Byondo?"
Ori amugarukamu ati:
"Yego seebo. Ngyire ngu narakurebireho?"
Byenaku amugarukamu ati.
"tukashoma hamwe kitala omuri Kabale."
Boona bamanyana,kandi nangwa bashemererwa.
Obwe omushaija ondiijo akaguma nabarebesa amaisho.
Byondo,atyo ayanjura owu yaija nawe.
Reero boona bashatu bagyira okushemererwa.
Aho,Byondo agambira Byenaku ati:
"Ogu nibamweta Kahonaho,kandi niwe yampeire akalimo."
Boona bashemererwa,obwe enkoko eriyo nesya.
Bwanyima y'ekiganiiro,Kahonaho hamwe na Byondo batyo bagyenda.
Mbwenu orunaku orwo,Byenaku akasiiba nayebuza aha ebintu byingyi munonga. Ekyokureba munywani weye wakare ayiine omurimo murungi kyikongyera kumuteganisa.
Ahabwokuba enyimaaho,Byondo akaba yashomire okuhitsya omu kibiina kya kashatu kyonka,kandi tarabasize kweyongyerayo.
Byenaku kuyarebire oku Byondo yabeire nanyiriira,ayongyera kutiina munonga.
Konka bambe ekyabeire nikyimugaruzamu amaani,nokugyira ngu akatunga empurizana naabo. Atyo agyira amatsiko maingi munonga.
Kuyabeire akyiriyo nayebuza,haija emotoko yekika kya 'Kyibinika.''
Etyo,emwemerera omumaisho,harugamu omushaija mugufu,ariyo nasheka.
Mbwenu Byenaku kuyamurebire,ayongyera kutangaara. Byondo,akaba agarukyire kuhereza Byenaku obutumwa bwe,.
Nikwo kumugyira ati: "Otatiina okuhiika ningaruka nobwiira bwingyi munonga. Omugeiga wangye owu wareeba yangyira nkubuze waba nobasa kuguma nohereza Abakozi 600 enyama eyokize buri kasheshe."
Reero aho Byenaku nameshemererwa maingi amugarukamu ati: "Ekyo ninkyibasa mukama wangye."
Reero aho Byenaku atyo ayetungyira ekyirimo ekyebishaju.
Byondo akaba nakora nka dereva wa Kahonaho. Mbwenu kubayongyeire okuganiira,Kahonaho yagyira ekyetengo kyokuyamba banywani beye ahabwokugyira ngu Byondo akaba nakora ateireho omutiima aha murimo gweye.
Kahonaho akaba ayiine esente nyingyi,kandi hoona abantu bakaaba nibamutiina.
Omwebazyo ogwe,Byondo areeta Byenaku aha kitebe kyikuru kyemishuburo ya Kahonaho,okugyira ngu bongyere okumanyana kandi n'okubarakwasagane emishuburo.
Reero aho,Byenaku ashutama na Kahonaho okwongyera kumanyana munonga.
Kahonaho akaba amazire obwire bureingwa omukibuga. Nangwa we bambe atarikumanya enaku y'ekyaro.
Mbwenu okurugyiriira,Kahonaho nawe akabonabona munonga konka yatekaho omutiima kubasa kukura kurungi.
Byenaku amubuuza ati: "owanyu shi yo ninkahi?"
Kahonaho amugarukamu ati:
"Mbwenu ebyangyebyo nibireingwa,oweitu tinkazagayo.konka nkakura nibangyira ngu nanye ndi owa Kabale, konka bambe nyowe abazeire bangye tindabarebireho."
Byenaku amugumyagumya namugyira ati:"Nekyobusaasi,konka ogyire okwikiriza.Mbwenu okaba nomanya ngu Ruhanga aryakuhitsa ahori? Orikworoora efuuzi ni Ruhanga. Mbwenu nyowe nakugambira ebyangye kanoriira."
Reero Kahonaho amugarukamu ati: "Nikyo orikurebera nimpimbisa Ruhanga buri'eizooba."
Konka Byenaku ayongyera kumubuza ati: " Reero owanyu Kabale okaba noruga omukyicweka kyiha?"
Kahonaho amugarukamu ati: "Tinkamanya kurungi, ahabwokuba taata na mama kubafeire,omukazi omugeiga owabeire ari munywani wa taata yandeta nkyiri muto. Mbwenu ekisirani ekyabeireho,Omukazi ogu akafa atakantwireyo. Nkaba nahiika omwitendekyero ahari makerere."
Reero Byenaku emiziga etandiika kumuretwa omumeisho,kuyagyeragyeraniise okubonabona kweye hamwe nokwa Kahonaho.
Kubabeire bakiriyo nibagamba,esiimu etandiika kujumera,reero batyo bahunamira ahompaho.
Esiimu eyabeire nejumera,ekaba nemanyisa Kahonaho kuyakyerererwa kuhiika omu mwanya ogu yabeire naaza kubugana omukundwa weye.
Reero Kahonaho agambira Byenaku ati: "eeh,naba nayebwa kunyineho kubugana omukundwa wangye."
Reero Byenaku amubuuza ati: "Oh,Oyiine omukazi?"
Kahonaho amugarukamu ati: "Tukyayesiima,konka nintekateka kwija kumutwara omuka,omubiro bitari byahare."
Nikwo kwimuka namashemererwa maingi,obwe Byenaku ariyo natamburira omumwanya. Kahonaho amugyira ati:
"Reeka ngyende nituza kwongyeraho nyensakare omukasheshe. Ningyira Byondo yakugambira ekyokukora."
Namashemererwa maingi,Byenaku amusiima namugira ati:
"Webare munonga,ninza kukukoreragye nkoku orikwenda."
Atyo,Byenaku akwata omunshaho, ayihamu emitwaro ebiri eza Uganda azimuhereza,batyo bashohora bagyenda.

Omwebazyo ogwo,Byenaku agyenda ayetoroora ekibuga kyona ari kuronda enkoko, okugyira ngu omurimo ogwamuherezibwa gwatambura kurungi.
Ekyomugisha, akabasa kuboona byona ebi yabeire naronda.Reero Byondo amugyira ati:
"Iwe kora byona,koramare ongambire ninza kukutwara owaawe."
Reero aho,Byenaku ayongyera kushemererwa. Konka nobu Byondo yabeire nagamba kurungi, akaba ayiine amarara maingi gensi okurugyiriira nokuyabeire ajwara empare.
Mbwenu Byenaku kuyamazire kuronda ebi yabeire nayenda, atyo ashutama omumotoka nk'omugeiga owakanyabwanya,reero aho beyongyerayo.

"Hide out" Gukaaba guri omwanya ogu abageiga ababeire baine ebyana byabo babeire baza kurya esente zaabo.
Abantu ababeire bateine esente bakaaba batakuzayo.
Mbwenu eshaha ezo, Buri muntu weena owabeire ataaha ahamuryango gwomwanya ogwe akaba abanza yakyeberwa okwenda kukuma ebyokwerinda.
Hakaba hariho omwishiki owabeire ayiine amaisho garikushushana n'enyonyozi, kandi amaguru geye gari nk'emitumba.
Kuyabeire asheka,mazima ebifuzi bitandika kuragara abasheija okukyira munonga abo boona ababeire bataine abashiki barungi.
Akaba ashutami,okuguru akuteire aha kundi,obwe manya amaino geye garikwera nk'orubare.
Reero Kahonaho ashutami ariyo mamureeba,amukwatsire omungaro ezabeire nizimurinkana.
Emeeza hoona bakaaba bagyitonire nebyokunwa ebyaburimuringo.
Konka we bambe Kahonaho akaba atarikunywa amarwa.
Kahonaho amugyira ati:
"Kemi,noza kuba omukazi wangye?"
Ori,amugarukamu ati:"Nkakugambira ngu ninkukunda.kandi ninza kuba omukazi waawe."
Reero aho bongyera okusindika rukundo yaabo. Konka nobu babeire nibaganiira,Kemi akaba aguma nareeba ahashaaha kandi nabwo akaba atatereire.
Mbwenu omukanya kakye,esiimu eguma nejumera,konka ayanga kugyakyira.
Reero Kahonaho amugyira ati:
"Ahabwenki otarikwakyira esimu?"
Kemi amugarukamu ati:
"Tinkubasa kwakyira esimu ndi naiwe. Nokyira esiimu zoona ahabwokuba naba nkwine nimba ntakayenda abantu okunteganisa.
Reero Kahonaho atandiika kweshekyera.
Kemi atyo ayimuka kuza kusheesha enyima.
Kahonaho amubuuza ati:
" kuwayimuka?
"Ndiyo ninza kusheesha reeka ngarukye."
Atyo ayimuka agyenda, obwe Kahonaho amaisho agateire aha kibunu kya Kemi ekyabeire kyiri nkekishaabo.
Mbwenu Kemi Kuyahikyire omukisharagaate,akwata esiimu ye atandiika kuterera owabeire naguma namuterera esimu.
Amugyira ati."
" sweetheart Ndihaihi kwija konka taata yaba akyaine emirimo eyi yaba nayenda ngu mukorere. Mpereza eshaha emwe yonka."
Reero atyo agaruka ahu Kahonaho yabeire ayeshutamiire.
Omukanya kakye,Kemi agyira Kahonaho ati:
"Nomanya ngu muzeyi wangye niwe yaba natera esimu? Hariho emirimo eyi yaba nayenda ngu maririize ahabwokuba nyensakare ariyo naaza America."
Reero aho,Kahonaho amugwa omukifuba atandiika kumunywegyera kandi amuhamiza kunamukunda munonga. Batyo bashutama omu motoka,bagyenda.
Konka kubabeire bahiika haihi norurembo,Kemi asharamu okurugamu,ahabwokuba akaba atakayenda taata weye kumureba. Nikwo kukwata akagari,reero Kahonaho akeyongyerayo.