Beyendeza 3

Chapter three.
Abakazi nabasheija ba Nyabwiina, bakaba bariyo nibakoresa amaani maingi munoonga omukasheeshe akorwakataano.
Keirungi atyo akwaata enshaho ye, eyabeire netukura,atyo ayorekyerera orurembo okubugana omukundwa we, Byenaku.
Nobu boona babeire nibaruga omukyanga kyimwe,eizooba eryo,bakaba baritebekanisize kurungi munonga okuza kwehamu,omumwanya ogwabeire guboneire.
Mbwenu akokunzire, nikakuraaza otabyamire,Beyendeza nawe atandika okwetebekanisa okuza omu rurembo obwe yamara kuhurikyiriza entebekanisa eyabeire nekorwa mwene'ishe ekiro ekyo.
Byenaku ayimuka atandika kwetebekanisiza orugyendo,obwe Beyendeza ariyo namuringuriza.
Byenaku kuyabeire yamara  okushemera, Beyendeza nawe ayimuka.
Abasigazi'aba bakaba batarikukwatanisa hamwe,nobu Byenaku yabeire atuura nayenda obusingye omu maka gaabo.
Ekyabeire nikyimara Beyendeza eishokye ahamutwe,n'okureeba omwana owazeirwe omukazi ondeijo,yabeire nayenda kuhungura ebintu by'ishe.
Nahabwekyo,akaba aine obwesigye bwingyi  aharutayayo rw'orushozi kurubasa okwaija okumuyamba.

Mbwenu,Byenaku kuyakwasire omuhaanda nashohora,Beyendeza nawe yamukurata.
Eizooba eryo,Byenaku na Keirungi bakabuganira omu mwanya ogwabeire nigwetwa "kahwa kanuzire."
Batyo batandika okurya ekyenyanja.
Omu mwanya ogwo nigwo gumwe,Beyendeza akaba ashutami omukishengye,yaguma nabaringuriza.
Beitu,tarabasize okugamba ekigambo kyoona,konka ebifuzi bikaguma nibimuragara okurugyirira okuyabeire nayenda Keirungi.
Eizooba eryo,rikamubeera eryenaku.
Reero ayekwaata ahamatama,atandika okwagura omutwe,nkowariibwa empazi. ahansi.
Byenaku hamwe nomukundwa we Keirungi kubamazire okurya ekyenyanja,batandika okwiruka omubunyasi obwabeire nibuterera.
  Byenaku rukundo emutemba atandika kweshongora agumize ati:
    " Keirungi oboneire ori nkenyonyoozi,
Amaisho gaawe ninkag'enyena,ekyibunu nekishabo...
Haza manya ntwire ninkurotaga mwana,ekyi kiro bwo timbyamire,eishi Ruhanga nankunda,okumpa ekintu Kyomuhendo ekintura nindoonda............"
Reero obwe  Beyendeza owabeire nabaringuriza,ayeyongyera Okuhurira obuhuruzi aha mutima.
Keirungi agambira Byenaku ati:
"Eiraka ryaawe niryesimisa,reeka nanye nkweshongorere.
Ebicuro byingyi bitwire nibinteraga,ekyi kiro bwo timbyamire,eishi Ruhanga nankunda,okumpa ekintu Kyomuhendo ekintwire nindoonda."
Aho ekiniga kyongyera okukwiita  Beyendeza,atyo ahurutukayo agyenda.
Omwebazyo ogwo,Byenaku kuyahikyire omuka,ashaanga Beyendeza akyingyire orwigi,atyo ayaanga okumwiguriraho. Obwe zikaba ziri shaha itano eze'itumbi.
Nobu Beyendeza yabeire ahurikyriize oku Byenaku  yabeire nateera orwigi,aketwaramu nkotarahuriire ekyabeire nikyigyenda omumaisho.
Reero Byenaku,aronda ekyokukora kyimuburira.
Asharama okuza ow'omushomesa okuronda oburaaro.
Hakaba hariho omwirima mwingyi,kandi hoona abantu bakaba babyamire.
Embwa ezabeire zikyira okutambura omumagyingo ge'itumbi,zityo zitandika okumoka.
Mbwenu omushomesa kuyahurire embwa nizimoka,ayimuka,ashutama omuntebe.
Omukyaaro ekyo,embwa kuzabeire zimoka munonga,abantu bamanya ngu hariho abashuma ababatahirira.
Enyimaho,omukazi owabeire amazire okuruga Kampala bakaba bamwibireho ebintu byingyi kandi bamwitiire omurufunjo orwabeire rurihaihi ne'ekanisa.
Omushomesa nobumanzi,atyo akwata baiburi atandika kushabira abashuma okugarukayo,ahabwokuba okwenda ebyabusha,kukaba nikuhenda ebiragiro bya Ruhanga.
Mbwenu embwa kuzamokire munoonga,abashaija enkwata mata beimuka batandika kuronda abashuma.
"Reeba ngugwe!!" Omwe ahabashaija owabeire nayetwa Rutaaba ayamuza,obwe yamara kureeba ekintu ekyabeire kyikozirwe nk'omuntu.Reero boona bairuka nibaza kukwata omushuma.
konka bambe ekyobusaasi, bakashanga busha.
Mbwenu Byenaku kuyarebire abantu bekyaro baimuka,agyira obwooba bwingyi munonga,ahabwokuba akaaba atakayenda okushwara, okurugyiriira entwaza eyiyabeire nagyenderaho.

Atandiika okwebuuza,abantu ekibaragambe okurugyiriira eshaaha ahuzabeire zahika.
Atyo ayeshereka omu mwiina muhango,konka kandi Byekwaso owabeire ari hamwe nab'ashaija baingi,amureeba,konka tarabasize okumwetegyereza kurungi.
Batyo amamanzi g'ekyaro baine amacumu nemihoro beiruka niborekyerera omwiina.
Kubahikyireho,batandiika kutinatinisa omushuma okurugayo.konka kandi Beyendeza aguma ahunami.
Byekwaso arekyera eibare,rikwaata busha,obwe Byenaku akaba ayesherekyire omukashonda k'omwiina.
Mbwenu abataka kubarebire omuntu atarikurugayo,basharamu kugyenda,konka Byekwaso abagyira ati:
"Bashamwe nareeba omuntu arikurengyera omu mwiina ogumpaha!."
Marisiari amugarukamu ati:
"Eky'orikugamba nokyimanya?"
"Eego ahabwokuba tinkagambagaho ebishuba.Nahabwekyo, omuntu ogu kw'araabe atarikwenda okurugayo,reeka tumwegyese ekyokukora." Byekwaso abagumya.
Batyo batandika kurekyera amabare,obwe Byekwaso na Marisiari bariyo nibaronda amatagi g'emiti.
Mbwenu amatagi kugabeire maingi,basharamu okuhemba omuriro omury'ogwomwiina.
Bwanyima yomuriro kuba mwingi,Byenaku atandika okuhurira obusaasi,reero ahurutukayo nkomushuma,agumize ati: "munsaasire ninye  Byenaku"
Boona bashoberwa,bwanyima ya Sabiiti omwe ahabashaija okureeba ekijwaro kya Byenaku.
Nobusaasi bwingyi munonga,Byenaku atandika kwehozaho.
Byekwaso amubuuza ati:
"Nomanya ngu' onyangarize ekyaro kyoona? Tugambire waaba noruga nkahi?."
Byenaku atandika okugamba byoona okubyagyenzire.
Aho abataka batandika okurira nk'abana abato,reero bamutwaara omwirwariro.
"Konka Beyendeza nayeyetaki?" Bamwe ahabantu ababeire bary'aho,batandika okwebuuza.
Konka baitu bamwe,tibarabasize okwikiriza ebyo byoona ebi Byenaku yagambire,bagumize bati:
"amaziima garyeija kweyoreka."

Mbwenu Keirungi kuyahikyire omuka,ebintu nawe tibiramwanguhiire.
Akashaanga enju ekyingyire,atyo atiina okwiguza.
Asharamu okuza omunju eyabeire ekyayombekwa, atyo agyibyamamu.
Kuyabeire akyiry'aho,ahurira orwari,reero ayongyera okutiina.
Konka bambe akaba ari emanzi nikwo kwimuka kuhurikiriza ebyabeire nibigyenda omumaisho,okuhisya obuyahurire bamwe nibagyira bati:."konka naba ntakumanya ngu Byenaku nawe nomuyaayi."
Mbwenu Keirungi kuyahuriire ebyo byoona,omutima gutandika okuteera. Atyo ayimuka ashohora.
Obwe'abantu bakaba bariyo nibayomba. Ayorekyerera ahu babeire nibagambira.
Ekiro ekyo,Beyendeza byoona ebyabeire nibigyenda omumaisho akaba abihurire.
Reero Keirungi akwaata omuhanda aza kureeba ekyaba ahari Byenaku.
Kuyabeire nagyenda,omutima gumwangyira.
Atyo agaruka enyima ayorekyerera eirembo ryaba Byenaku.
Kuyabeire yahika omukibuga,areeba Beyendeza ayemereire aha muryango,amubuuza ati:
"Kunimpurira enduru abantu nibeshongora Byenaku yakoraki?"
Beyendeza amugarukamu ati:
"Nanye byanshobera.Noreeba, nkakugambira ngu Byenaku nomushuma wayanga,Mbwenu hati tibamukwata nenkooko ya Karuhize!"
Reero aho,Keirungi atandika okugareberamu nkorusonzi.
Beyendeza amugyira ati:
"Nahurira nibakugambaho,ngu naiwe wamuretera okwiba enkoko,kandi kumwaaba murageine."
Ekyi kyikwongyera okutinisa Keirungi,reero ayegumyagumya nabuuza ati:
"Nimbasa kumurebaho?"
Beyendeza amugarukamu ati:
"Ahoobwe waba oyine amagezi,reeka omukasheeshe abebyokwerinda kubare'ije otagyira ngu nomanya Byenaku."
Konka bambe Keirungi ahamiza Beyendeza kw'omutima gwe gury'afa na Byenaku.
Nobu Byenaku yakukoraki,Keirungi ahamiza Beyendeza kunaza kumukunda mpaka afiire.
Ekyo,kyikongyera okwiiha Beyendeza omu mbera,nikwo okutandika okuroonda ekyokukora.
Atyo amubeihabeiha okumutwaara ahu Byenaku yabeire'ari.
Kubabeire bahika omurusharara,ah'abantu ababeire nibayomba babeire batakyihurirwa,Beyendeza abuza Keirungi ati:
"Nobasa kukyehabura,okajura empare okabanza wankorera ekintwiire ninkwendaho?" Obwe zikaba ziri shaha mwenda ezekyiro
Nokutiina,Keirungi ayamuza nagira ati:
"Nobworikoraki!!"
Reero aho,Beyendeza amukwaata,amutega omutego kandi agwa ahansi.
Nikwo kushumurura empare ye,akatandika okweshemeza.
Keirungi tarabasize kushohoza ekigambo kyoona okuhisya obu Beyendeza yamazire kukora ekyi yabeire nayenda.
Atyo,amukwaata amaraka atandika okumuniga.
Kuyamazire kumwita,nikwo kumureka'aho,akeiruka agaruka omuka okubyaama.